Sakthi Foundation

வளையாபதி [ஐம்பெருங்காப்பியங்களுள் ஒன்று]

மாணவர்களுக்கு ஏற்ற வடிவில் எழுதப்பட்டது.

தமிழ் மொழியில் ஐம்பெரும் காப்பியங்கள் என்று புகழ் பெற்றவை சிலப்பதிகாரம், மணிமேகலை, சீவகசிந்தாமணி, வளையாபதி மற்றும் குண்டல கேசி ஆகும்.

இவற்றுள் முதன் மூன்று காப்பியங்களும் முழுமையாகக் கிடைத்துள்ளன.மற்ற இரண்டும் முழுமையாகக் கிடைக்கவில்லை.கிடைத்த சில பாடல்களின் விளக்கத்தையே கற்று வருகிறோம்.

வளையாபதி என்ற காப்பியம் மனித வாழ்க்கைக்கு என்ன உணர்த்துகிறது என்பதை மாணவர்களின் பக்குவத்திற்கு ஏற்ப இக்கட்டுரை எடுத்துக் கூறும்.

வளையாபதி காப்பியத்தை எழுதிய புலவரின் பெயரும் நமக்குத் தெரியவில்லை.

அளவுக்கு அதிகமான ஆசையினால் ஒன்றை அடைய எத்தகைய தீய வழியையும் கைக்கொள்ள மனிதன் எண்ணுவான்.இது மஹா ஆபத்து!

எதிர்பார்ப்புகள் நிறைவேறாத போது, மனதில் பயங்கரமான கோபம் உண்டாகும்! இந்தக் கோபம் ஏற்படாதவாறு மனதைப் பக்குவம் செய்ய வேண்டும்.

பிறரது புகழ், பதவி, பொருள், வாழ்க்கை அமைப்பின் மீது பொறாமை கொள்ள வேண்டாம்.

உண்மையான அன்பும் பண்பும் பக்தியும் கொண்ட பெரியவர்களை வணங்கி அவரது அறிவுரைக் கேட்டுப் பின்பற்றினால் வாழ்க்கையில் இன்பம் உண்டாகும்.

சேர்த்து வைத்துள்ள பணம், சொத்து, இளமை, அழகு, பதவி ஆகியன நிலை இல்லாதவை.எனவே அவற்றைப் பாதுக்காப்பதில் அதிகம் சக்தியையும் நேரத்தையும் செலவிட வேண்டாம்.சமூஹ முன்னேற்றத்துக்குப் பாடுபடுக, நல்லதே எண்ணுக - நல்லதே செய்க.

அழகான வேலைப்பாடு கொண்ட க்ரீடத்தை அணிந்த மன்னன் எத்தனை புகழ் மிக்கவனாக இருந்தாலும் அவனும் ஒருநாள் இறப்பான்.அதனால் இவ்வாழ்க்கை நிலைத்தது இல்லை என்று உணர்ந்து கொள்க.

ஆசையின் காரணமாக அதை அனுபவிக்கத் துடிக்கும் போது பிறவிகள் எடுக்க வேண்டி இருக்கிறது.அதைக் கருத்தில் கொள்க.பிறவியினால் சதா வாழ்க்கையில் துன்பமே!

மனிதப்பிறவி என்பது கிடைப்பதற்கு மிக மிக அரிது.அதை நல்ல முறையில் பயன்படுத்த வேண்டும்.

மனிதனாய்ப் பிறந்தாலும் நல்ல ஒழுக்கம் கொண்டவனாக இருக்க வேண்டும்.உடலில் எவ்விதக் குறைபாடும் இல்லாமல் பிறப்பதே மிகவும் கொடுத்து வைத்த அருள் ஆகும்.அழகும், அறிவும், அன்பும், ஒழுக்கமும் கொண்டவர்கள் அதை உயர்ந்த எண்ணங்களும் சேவைகளும் செய்யவே பயன்படுத்த வேண்டும்.

ஐம்புலன்களில் மிகவும் சக்தி உடையது நாக்கே ஆகும்.அதை அடக்கி ஆள வேண்டும்.உண்பதிலும் பேசுவதில் மனிதன் அடக்கத்தைக் கையாள வேண்டும்.அவ்வாறு நா அடக்கம் இருந்தால் புகழ் பெறலாம், இல்லை என்றால் சிறை செல்லுதல், தண்டனை பெறல் போன்ற் துன்பங்களும் வரும்.

பொய் பேசாதீர், பிறரைப் பற்றி இல்லாததும் பொல்லாததும் சொல்ல வேண்டாம், எப்போதும் எல்லாரிடத்தும் எல்லா விஷயங்களிலும் குறை காண வேண்டாம், மற்றவர்களை ஒருபோதும் தரக்கீழாக எண்ணவே கூடாது, உயிர்க்கொலை - அசைவம் கூடாது, பிறர் மனம் நோகும் படி நடக்கவோ பேசவோ கூடாது [இவற்றைச் செய்தால் அவற்றின் பலன் உன்னையே ஒரு நாள் வந்தடையும்]

மற்றவர்தம் பொருள் மீது ஆசைப் படவே கூடாது, எந்தப் பொருளையும் திருடக் கூடாது, தவறான முறையில் பொருள் சம்பாதிக்கக் கூடாது, பிறர் தவறான வழியில் சம்பாதித்தப் பொருளை நீங்கள் அனுபவிக்க வேண்டாம், தெய்வத்தின் பெயரில் அப்பாவி உயிர்களைப் பலியிடுதல் மஹா மஹா பாவம், மனிதனைக் கொலை செய்வதோ அதை விட மிகப் பாவம், வறுமையால் கஷ்டப்படுபவர்களைப் பார்த்து கேலி செய்யக் கூடாது.

வறுமையில் கஷ்டப்படுபவர்கள், துறவிகள், நல்லவர்கள், ஆதரவற்றவர்கள், அனாதைகள் ஆகியோருக்கு அவர்தம் பசியை அறிந்து தயவு செய்து அன்னதானம் செய்க.

ஒவ்வொரு நாளும் ஒரு நல்ல செயலையாவது செய்க, நல்லது செய்ய மற்றவர்களையும் தூண்டுக, சுயநலத்தை விட முயற்சி செய்க, எல்லா உயிர்களையும் அன்புடன் மதித்திடுக, யாரையும் நமக்குக் கீழாக எண்ணவே கூடாது, பாவமான காரியங்களையும் கொடுமைகளையும் பயத்துடன் கைவிடுக.

அனைதிற்கும் மூலகாரணமான சத்தியத்தை உணர்க.

அசைவ உணவை உண்பது கொலை செய்வதற்குச் சமமே!

பேராசை, களவு, போதைப் பழக்கம், கொலை, சூதாடுதல் [ஏமாற்றுதல்] ஆகிய ஐந்து மஹா பெரிய பாவங்கள்.இவற்றைச் செய்வதால் மனித வாழ்க்கை மிக மிகக் கொடிய துன்பங்களை அனுபவிக்கும்.

மனிதன் இவ்வுலகில் வாழ மிகவும் பாடுபட்டு உண்மையாக நேர்மையாக சம்பாதிக்க வேண்டும், அதை நல்ல காரியங்களுக்கு அதிகம் பயன்படுத்த வேண்டும்.

Sakthi foundation

தென்மதுரையும் கபாடபுரமும்...

கன்யாகுமரிக்குக் கீழ் ஒரு மாநிலப் பரப்பு இருந்தது.அது தான் லெமூரியாக் கண்டம்.

அங்கு பாண்டியர்களின் முதல் தலைநகர் இருந்தது.அதன் பெயர் தென்மதுரை.

அங்கு தான் முதல் தமிழ்ச் சங்கம் இருந்தது.அகத்தியரைத் தலைவராக வைத்திருந்தனர்.

அங்கு தான் அகஸ்தியர் தமிழ் மொழிக்கு முதன்முதலில் இலக்கணம் எழுதினார்.அதன் பெயர் அகஸ்தியம்.

அந்தத் தலைநகரம் கடல்கோளால் அழிந்தது.

__________________

பின்னர் பாண்டியர்கள் இரண்டாம் தலைநகரை உருவாக்கினர்.

அதன் பெயர் கபாடபுரம்.அதுவும் கடற்கரைப் பகுதியில் தான் அமைந்தது.

பல நாடுகளுடன் வியாபாரம் செய்யக் கடல் வழியைப் பாண்டியர்கள் பயன்படுத்தினர்.

பாண்டியர்களின் குலத்தொழில் மீன் பிடித்தல்.அதனால் மீன் சின்னத்தைக் கொடியில் கொண்டனர்.

அவர்களுடைய குலதெய்வம் பார்வதி.அதனால் தம் நாட்டைக் குமரி நாடு, கன்னி நாடு என்றும் அழைத்தனர்.

இக்கபாடபுரத்தில் இரண்டாம் தமிழ்ச்சங்கம் தொல்காப்பியர் தலைமையில் நிகழ்ந்தது.

அவர் அகஸ்தியருடைய மாணவர்.அவர் அகஸ்தியத்தை மீண்டும் ’தொல்காப்பியம்’ என்ற இலக்கணமாக எழுதினார்.

ராமாயணம் இக்கால கட்டத்தில் நிகழ்ந்தது.ஹனுமான் கபாடபுரத்தில் சீதைத் தேடினார்.

கபாடபுரமும் கடல்கோளால் ஒரு காலத்தில் அழிந்தது.

__________________________________

அப்போது பாண்டிய நாட்டை ஆண்ட ராஜா குலசேகரன் ஆவான்.

அவன் புதிய தலைநகரைக் கடல் பகுதியில் இருந்து தள்ளி அமைக்க எண்ணினான்.

அப்பொழுது எதிர்காலத்தில் தன் நாட்டைக் கடல் அழிக்காமல் இருக்க, கன்னி தேவிக்குக் கோயில் எழுப்பினான்.அது தான் கன்யாகுமரி.

பின் வடக்கு நோக்கிச் சென்று மணலூர் என்ற ஊரில் இருந்து ஆட்சி செய்தான்.

புதிய தலைநகரை அமைக்க ஏற்ற இடம் தேடினான் குலசேகரன்.

a grade 7th student's report

பள்ளிக்கூடம்

தமிழ் மொழியில் இவ்வார்த்தை அன்றாடம் மக்களுக்கு வாயில் அவசியம் சொல்லப்பட வேண்டிய வார்த்தை ஆகிவிட்டது.

School என்ற ஆங்கில வார்த்தையின் மறுமொழி வார்த்தை தான் பள்ளி.

ஆனால் இது தமிழ் மொழிச் சொல் அல்ல? பின்?

இது இந்தியாவின் மிகப் பழைய மொழிகளுள் ஒன்றான பாழி மொழிச் சொல்.

சரி இது எப்படி நம்மூருக்குள் வந்தது?

பாரத தேசத்தின் மிகப் பழைய சமயங்களுள் ஒன்று சமணம்.இதுவே ஜைன மதம் ஆகும்.ரிஷிப தேவரால் பல ஆயிரம் ஆண்டுகளுக்கு முன் நெறிப்படுத்தப்பட்ட சமயம் சமணம்.

சதா சண்டை, பொருளாசை, மண் வெறி, சுயநலமான வாழ்க்கை,வன்முறை, உயிர்ப்பலி, கண்மூடித் தனமான மத நம்பிக்கைகள், உயிர்ப்பலிகள், சாதி இன மொழி வேற்றுமைகள் பாரத தேசத்தில் நிலவிய போது, மனிதனின் இன்ப துன்பங்களுக்கு விடிகால் தேடி ரிஷிப தேவர் சில உண்மைகளைக் கண்டறிந்து வாழ்க்கையை நெறிப்படுத்த உருவாக்கிய சமயம் இதுவாகும்.

தமிழகத்தில் சமணம் என்றே ஜைன மதம் அழைக்கப்படுகின்றது.அம்மதத்தை மக்கள் முன் வளர்த்தவர்கள் ”தீர்த்தங்கரர்” என்று மரியாதையுடன் அழைக்கப் படுவர்.அதவாது ஆச்சாரியர்கள் என்று பொருள்.

சமண சமயத்தில் ரிஷிப தேவர் தொடங்கி மொத்தம் 24 தீர்த்தங்கரர்கள் உள்ளனர்.அவர்களுள் கடைசியானவர் வர்த்தமான் மஹாவீர் ஆவார்.

புத்தருக்கு முன்பே மஹாவீர் தோன்றி இச்சமயம் மூலம் மக்களை நெறிப்படுத்தினார்.

சமண சமயம் தமிழகத்தில் சுமார் 3000 ஆண்டுகளுக்கு முன்பு இருந்தே மக்களிடம் செல்வாக்கு பெற்று இருந்தது.ஆனால் சில காரணங்களால் கி.பி 7ஆம் நூற்றாண்டுக்குப் பின் அதன் செல்வாக்கு குறைந்தது.

பின்னர் மீண்டும் கி.பி 9ஆம் நூற்றாண்டு முதல் 13ஆம் நூற்றாண்டு வரை மறுமலர்ச்சி பெற்றது.ஆனால் இன்று சமணம் தமிழகத்தில் வெறும் கோயில், குகைப்பள்ளிகள், தொல்பொருள் காட்சிப் பொருள்கள் வடிவில் தான் உள்ளது.மிக மிகக் குறைந்த அளவிலேயே சமணம் தமிழகத்தில் உள்ளது.ஆனால் பாரத தேசத்தின் வடபகுதி பலரால் பின்பற்றப் படுகின்றது.

இந்த சமண சமயம் மக்களுக்கு ஒரு உண்மையை எடுத்துக் கூறியது.அது என்ன?

நல்லது செய்தால் நல்லது நடக்கும் - தீயது செய்தால் தீயதே நடக்கும்.இதையே வினைப்பலன் என்று கூறுவர்.இதையே பாரத தேசத்தின் அனைத்துச் சமயங்களும் கூறினும், சமணம் மக்களுக்கு ஒரு வேகத்தடை போடுவது போல் இவ்வுண்மையை மட்டும் கையில் எடுத்துக் கொள்கிறது.

மக்களை நெறிப்படுத்த ஐந்து முக்கிய வாழ்க்கைக் கட்டுப்பாடுகளை வகுத்தது.காரணம் அவ்வைந்து காரணங்கள் மூலமே மனிதன் தீவினைக்கு இட்டுச் செல்லப் படுகின்றான்.

அவை:

உயிர்க்கொலை

போதை

பொய்யாமை

தனிமனித ஒழுக்கம் [பிறர் மனை விரும்பாமை]

அதீத ஆசை [எதன் மீதும்]

தெய்வங்களை வேண்டி, சடங்குகள் செய்து, உயிர்ப்பலி பல செய்து, போராலும் களவாலும், நேர்மையற்ற செயல்களாலும் ஈட்டிய பொருளை என்ன செய்வது?எந்த நேரத்திலும் முடிந்து விடும் மனித வாழ்க்கையை சமணம் அதிகம் மக்களுக்கு எச்சரிக்கை விடுத்தது.

உடல்-இளமை-பொருள் நிலையாமையை முன் வைத்தே சமயக்கருத்துகள் வெளிப்பட்டன.

கண்மூடித்தனமான சடங்குகளை ஒதுக்கியது.

உருவ வழிபாடுகளை ஒதுக்கியது.

சாதி-இனம்-மொழி-பால் வேற்றுமைகளை ஒதுக்கியது.

மனிதன் வினைகளில் இருந்து விடுபட்டு நித்யமான ஆனந்தத்தில் லயிக்கும் முக்திக்கு ஆன்மீகப் பயிற்சி செய்ய வேண்டும் என்பதையே உயர் குறிக்கோளாகக் கூறியது.

அதையே நிர்வாணம் என்று சமணர் குறிப்பர்.

எல்லாவற்றையும் கழற்றி எறிந்து விட்ட நிலையே நிர்வாணம் ஆகும்.

அதன் அடையாளமாக ஆண் சமணத்துறவிகள் திகம்பரராக - ஆடையே இல்லாதவராக வாழ்ந்தனர்.

பெண்களும் துறவிகள் ஆகும் சுதந்திரத்தை சமணம் அளித்தது.

பொருள் தேடியதன் பலனே அதைக் கொண்டு நான்கு வகை சமூஹ சேவை செய்யவதற்கே என்று உணர்த்தியது சமணம்.

அவை: அன்ன தானம் - அறிவு தானம் - அடைக்கல தானம் - ஒளஷத தானம்.

அன்ன தானம் - கைவிடப்பட்ட மக்களுக்கு உயிர் வாழ உணவிடல்.

அறிவு தானம் - அடிப்படைக் கல்வி மற்றும் வாழ்க்கையின் தர்மத்தை உணர்த்தும் கல்வியைத் தருதல்.

அடைக்கலம் - வாழ்க்கைத் துன்பத்தாலும், சமூஹக் கொடுமைகளாலும், போர் வன்முறையாலும் பாதிக்கப்பட்ட மக்களுக்கு அடைக்கலம் தருதல்

ஒளஷதம் - மிகச் சிறந்த மர்ருத்துவத்தை நோயாளிகளுக்கு அளிக்கும் மருத்துவ சேவை.

ஒதுக்கப்பட்டவர்கள், ஏழைகள், உயர்குடி வாணிபர்கள், உயர்ந்த உழவர்கள் ஆகியோரை இச்சமணம் கவர்ந்தது.

அக்காலச்சூழலுக்கு மிகவும் ஹிதம் தரக்கூடியதாக தர்ம நெறிகள் விளங்கின.கண்டிப்புடன் வலியுறுத்தப்பட்ட சடங்குகள், சம்ப்ரதாயங்கள் ஆகியவற்றில் இருந்தும் குறிப்பாக சாதி வேற்றுமையில் இருந்தும் விடுதலை பெற எண்ணிய மக்கள் சமணத்தில் சேர்ந்தனர்.

தமிழக மன்னர்கள் சமணத்தை ஏற்றுக் கொண்டு ஆதரித்தனர்.குறிப்பாக மூவேந்தர்களுள் பாண்டிய வேந்தர்கள் பல காலம் சமணத்தைப் பின்பற்றினர்.அதனால் சமண சயத்துக்குத் தமிழகத்தில் பாண்டிய தேசத்திலேயே அதீத செல்வாக்கு நிலவியது.

அதை எதன் மூலம் உணரலாம்?

தமிழகத்தில் பல இடங்களில் சமணர்களின் வழிபாட்டுக் கோயில்கள், மலைகளில் குகைக்கல்வெட்டுகள், குகைகளில் படுக்கைகள், புதை பொருள்கள், இலக்கியங்கள் ஆகியன மூலம் சமணத்தின் தர்ம நெறியினை உணரலாம்.

சமண சமயத்துக்கும் கொங்கு நாட்டுக்கும் மிகுந்த தொடர்பு உண்டு.அதே போல் பாண்டிய நாடு சமணத்துக்கு மிகவும் முக்கியத்துவம் அளித்த காலத்தின் பல அடையாளங்கள் இன்று எஞ்சியுள்ளன.

அவற்றின் மூலம் இக்காலச் சமூஹம் எதை உணர்தல் வேண்டும் என்பதையே இப்பகுதியின் நோக்கமாகக் கொண்டோம்.

பாண்டிய நாடு என்பது இன்றைய திண்டுக்கல்-மதுரை-தேனி-சிவகங்கை-ராமநாதபுரம்-விருதுநகர்-நெல்லை-தூத்துக்குடி-கன்யாகுமரி மாவட்டங்கள் ஆகும்.அதுவே அன்று பெரிய நாடும் ஆகும்.

அப்பகுதிகளில் பல இடங்களில் சமண சமயத்தின் சின்னங்கள் இன்றும் கிடைக்கின்றன.குறிப்பாக மதுரை மாநகரைச் சுற்றி எட்டு குன்றுகள் சமணத்தின் முக்கிய செயல்பாட்டு ஸ்தலங்களாக விளங்கியுள்ளன.அவற்றைப் பல அறிஞர்கள் ஆய்வுகள் செய்து பல விஷயங்களை வெளிக்கொண்டு வந்துள்ளனர்.

ஆனால் அவற்றின் மூலம் இக்காலத்தில் நாம் அறிய வேண்டியது என்ன என்பதைப் பகிர்ந்து கொள்கிறோம்.

சமண சமயத்தைப் பரப்பிய குருமார்கள் பாலி-சம்ஸ்க்ருதம்-கன்னடம் மற்றும் தமிழ் மொழிகளில் புலமை பெற்று இருந்தனர்.

அவர்கள் பல உயர்ந்த சமய, மருத்துவ, நீதி, இலக்கிய நூல்களைத் தமிழில் மொழிபெயர்ப்பு செய்துள்ளனர்.

சமண சமயத்தைச் சேர்ந்த பல புலவர்களும் குருமார்களும் உயர்ந்த வாழ்க்கைக்கு வழிகாட்டும் இலக்கியங்களை எழுதியுள்ளனர். [நாலடியார், சிலப்பதிகாரம், சீவகசிந்தாமணி மற்றும் பல]

தமிழ் மொழியில் வளர்ச்சியில் அதிக கவனம் செலுத்தினர்.பல தரமான எளிய காலத்துக்கு ஏற்ற மாற்றங்களுடன் கூடிய இலக்கண நூல்கள் எழுதினர். [யாப்பெருங்கலக்காரிகை, நன்னூல்]

கல் சிற்பம், உலோக வார்ப்புக் கலை, ஓவியம் ஆகிய நுண்கலைகளுக்கு ஊக்கம் தந்தனர்.

சமூஹத்தில் பல தான தர்மங்களும் கொடைச்செயல்களும் செய்தவரை நன்றி மறவாமல் அவர்தம் பெயருடன் அவர்தம் செயலையும் கல்வெட்டாகப் பதித்தனர்.

மன்னர்களின் புகழை மட்டும் பாடும் காலத்தில் அவர்கள் தைரியமாக சமூஹத்தில் சில கொடைகள் செய்த ஆன்மீக அன்பர்களையும் கல்வெட்டின் மூலம் பதிவு செய்யும் வழக்கத்தை ஏற்படுத்தினர்.

திகம்பர அம்மணச் சமணர்கள் ஊருக்குள் வாழவில்லை.அவர்களால் புலன் அடக்கம் சிலருக்குச் சீர்கெடலாம் என்ற உண்மையை உணர்ந்தே ஊரின் ஒதுக்குப் புற மலைக்குகைகளில் வாழ்ந்தனர்.இவர்கள் வெளிப்படையான துறவறத்தை வற்புறுத்தினார்கள் என்பதற்கு சாட்சி இல்லை.

இல்லறத்தில் இருந்த படியே முக்திக்கு வழிகாட்டும் பல எளிய தர்ம நெறிகளை வகுத்தளித்தனர்.

ஆனால் தர்ம சிந்தனையில் மனம் லயிக்க இடைவிடாத சத்சங்கம் தேவை.[உபதேசம், ஆலோசனை, கலந்தாய்வு, உரையாடல் ஆகியன சத்சங்கம் ஆகும்]அவற்றின் பொருட்டு தாம் வாழ்ந்த குகைகளில் சத்சங்கக் கூட்டங்கள் நிகழ்த்தியுள்ளனர்.

பள்ளி ஆன பளி...

சத்சங்கம் நிகழ்ந்த இடங்களே பளி ஆகும்.அதுவே பள்ளி ஆனது.

உயர்ந்த வாழ்வியல் கருத்துக்களை அடிப்படைக் கல்வியுடன் கற்றுத்தரும் சமணக்குகைகள் பள்ளிகள் எனப்படும்.

மேலும் சமண குருமார்களின் கல்படுக்கைகள் பள்ளி எனப்படும்.இன்றும் பள்ளி அறை என்பது படுக்கை அறையின் பெயரே ஆகும்.

பள்ளிகளில் மருத்துவம், வான சாஸ்த்ரம், ஜோதிடம், சிற்பம், ஓவியம், இலக்கிய-இலக்கணம், நீதிவியல் போன்ற பல துறைகளில் நூல்கள் தமிழில் செய்யப்பட்டுள்ளன.

ஊர் மக்களின் ஒத்துழைப்பை சமண குருமார்கள் பெற்றுள்ளனர்.

ஊர்ப்பெரியவர்கள், வியாபாரிகள், பெரும் நில தனவான்கள் பள்ளிகளை உருவாக்கித் தங்கள் ஊரில் கல்வி விழிப்புணர்வை ஏற்படுத்தினர்.அவ்வாறு பள்ளிகளை உருவாக்கியவர்களின் பெயர்களும் செயல்களும் கல்வெட்டாகப் பதிவாகியுள்ளன.

தமிழ் நாட்டில் மிகவும் பழங்காலத் தமிழ்க்கல்வெட்டு கி.மு 2ஆம் நூற்றாண்டின் ஒரு சமண குகைக் கல்வேட்டே ஆகும்.அது மதுரைப் பகுதியில் இருந்தே கிடைத்துள்ளது.

ஒரு சமணப் பள்ளியை ஒரு மலைக்குகையில் உருவாக்கிக் கொடுப்பதன் மூலம் ஒரு சமூஹத்துக்கே உயர் வழிகாட்டிய நல்வினைப் பயன் மனிதனுக்குக் கிடைத்துள்ளது.

குகைகளில் பொதுவாகக் கல் படுக்கைகள், கல்வெட்டுகள், சமண தெய்வங்களின் வடிவம், குறியீட்டு ஓவியங்கள், தீர்த்தங்கரர் சிற்பங்கள் உள்ளன.

பெரும்பாலான குகைகளின் மீது விழும் மழைத் தண்ணீர் வீணாகாமல் மலையின் கீழ் வாய்க்கால ஓடி சேமிக்கப்பட்டு rain water harvesting செய்யப்பட்டுள்ளது.

ஒளி - ஒலியைக் கைவிடாத சமணம்...

வெளிச்சத்தின் விஞ்ஞான பூர்வமான உண்மையை உணர்ந்த சமணரும் ஒளி வழிபாட்டைக் கைவிடவில்லை.பூக்கள் தூவிதல், நறும்புகை போடுதல், விளக்கு ஏற்றி வழிபடுதல் ஆகியன சமணத்தில் உள்ளன.பெண் தெய்வங்கள் வழிபடப்படுகின்றன.வாழ்வின் தேவைகளைப் பூர்த்தி செய்ய ஜீவாதார சக்தியை மனிதன் அதிகரித்துக் கொள்ள வேண்டும், அதற்கு ஜோதி முன் வழிபடுதல் அவசியம் என்ற கோட்பாட்டை வலியுறுத்தவே பல குகைப்பள்ளிகளில் தீர்த்தங்கரர் திருமேனிகட்கு முன் விளக்கு ஏற்றி முறையாக மந்திரங்கள் உச்சரித்து வழிபடும் சடங்கை வலியுறுத்தினர்.பல கல்வெட்டுகள் அத்தகைய விளக்கு ஏற்றிடத் தேவையான பொருளை தானம் செய்த கொடையாளிகளைப் பற்றியே உள்ளன.

சமண சமயத்தை வகுத்துக் கொடுத்த மஹான்கள் பல கருத்துக்களையும் சடங்குகள் மூலம் உணர்த்தினர்.பல குறியீடுகளையும் கொண்டு வந்துள்ளனர்.

அரசாங்கத்தின் மதிப்பையும் விருதையும் பெற்ற பல வணிகர்கள் தாம் சம்பாதித்த பொருளைக் கொண்டு சமணப் பள்ளிகளை ஏற்படுத்தி ஊருக்கே விழிப்புணர்வு உண்டாகக் காரணம் ஆகி இருக்கும் உண்மையை இக்கால மக்கள் உணர்தல் அவசியம்.

இன்றும் சரியாக உண்ண வழியில்லாத மக்களும், வறுமையால் நோய்க்கு மருத்துவம் செய்ய இயலாத ஏழைகளும், தரமான கல்வி இல்லாத ஊர்களும், ஆபத்தில் அடைக்கலம் தேடும் ஜனங்களும் உண்டு.அவர்களும் நாம் ஏதாவது ஒருவழி சமணத்தின் வழிநின்று கை கொடுக்க வேண்டும்.

குருமார்களை மிகவும் மதிக்கும் பண்பாட்டை உருவாக்கிய சமணப்பண்பை நாம் பள்ளிகளிலும் ஆன்மீகத்திலும் பின்பற்ற வேண்டும்.

மதுரைக்குச் செல்லும் போதும், மேறு ஊர்களில் பயணிக்கும் போதும் சமணச்சின்னங்களை அறிந்து சென்று காண்க.கணினியில் you tube மூலமாவது அவர்தம் பழமையை, சமூஹப்பொறுப்பை உணர்க்க.அவற்றைப் பாதுகாக்க முயற்சிப்போம்.

Dr.Pradheep Kumar - Dr.M.Madeswaran

Madras - 16.1.2015

பல்லவர்களின் வரலாறு

[மாணவர்களுக்கு உரிய வகையில் சுருக்கி அமைக்கப்பட்டது]

சுமார் கி.பி 3 - கி.பி 9ஆம் நூற்றாண்டு வரை பல்லவர்கள் தென் பாரதத்தை ஆட்சி செய்த காலம் ஆகும்.

அகநானூறு இலக்கியத்தில் இரண்டு இளந்திரையர்கள் என்ற அரசர்கள் குறிப்பிடப்படுகிறார்கள்.

மூத்த திரையன் இன்றைய ஆந்திராவின் கூடூர் நகரைத் தலைநகராகக் கொண்டு ஆண்டான்.அடுத்தவன் காஞ்சியைத் தலைநகராகக் கொண்டு ஆண்டான்.

சோழ மன்னர் குடும்பத்துக்கும் வடதேசத்தில் நாக இன அரச குடும்பத்துக்கும் இடையில் ஏற்பட்ட தொடர்பால் பிறந்தவர்களுள் ஒருவன் மூலம் பல்லவ அரச பரம்பரை ஆரம்பம் ஆனது.

பல்லவர்கள் ஆண்ட பகுதி தொண்டை நாடு எனப்பட்டது.தொண்டைக் கொடி என்பது இப்பகுதியில் உள்ள தாவரம் ஆகும்.அதைத் தன் அரச குலத்தின் தாவரச் சின்னமாகக் கொண்டனர் தொண்டை அரசர்கள்.

இவர்கள் ஆரம்பகாலத்தில் புத்தம் சமணம் மதங்களைப் பின்பற்றினர்.பின்னர் சைவ வைஷ்ணவ மதங்களில் ஈடுபட்டனர்.

காஞ்சிபுரம் பல்லவர்கள் வசம் வந்த வரலாறு

ஆரம்பகாலத்தில் காஞ்சிபுரம் சோழர்களின் வசம் இருந்தது. அதைப் போரிட்டுக் கைப்பற்றிய பல்லவன் பெயர் குமார விஷ்ணு.

பின்னர் சுமார் நான்காம் நூற்றாண்டில் விஷ்ணு கோபன் என்ற அரசன் ஆண்ட போது காஞ்சியை மீண்டும் சோழர்கள் கைப்பற்றினர்.

மீண்டும் ஆறாம் நூற்றாண்டில் சிம்மவிஷ்ணு என்ற மன்னன் காஞ்சியைக் கைப்பற்றித் தலைநகரம் ஆக்கிக் கொண்டான். ”பூமியின் மீது உலாவும் வீரச் சிங்கம்” என்று கசகுடிச் செப்பேடுகள் புகழ்கின்றன.

தமிழ், ப்ராக்ருதம் மற்றும் சம்ஸ்க்ருதம் ஆகிய மொழிகள் பல்லவர்களால் பயன்படுத்தப்பட்டன. அவர்களின் எழுத்து வரிவடிவம் பல்லவ க்ரந்தம் அல்லது ‘’பஹல்வி’’ எனப்படும். அவர்கள் எழுப்பிய குடைவரைக் கோயில்களில், செப்பேடுகளில் அதன் மூலமே மெய்கீர்த்திகள் பொறிக்கப்பட்டன.

புத்தரின் வாழ்க்கை வரலாற்றை ஆறாம் நூற்றாண்டில் பல்லவர்கள் வடமொழியில் எழுதினர்.அதை அரபு, க்ரேக்கம், ஹீப்ரு, லத்தீன் போன்ற மேற்கத்திய மொழிகளில் மொழிபெயர்த்தனர்.

ஸ்கந்த வர்ம பல்லவன் - மூத்த பல்லவன்.க்ருஷ்ணா முதன் பெண்ணாறு வரை ஆண்டான்.அஸ்வமேத யாகம் செய்தான். ”தர்மத்தைப் பாதுகாக்கும் மிக உயர்ந்த அரசன்” என்று அவனை செப்பேடுகள் புகழும்.

சிம்ம வர்மன் 1 - 275–300 CE

ஸ்கந்த வர்மன் 1 - 300 - 350 CE

விஷ்ணு கோபன் 350 – 355 CE

குமார விஷ்ணு I - 350–370 CE

ஸ்கந்த வர்மன் 2 370–385 CE

வீரவர்மன் 385–400 CE

ஸ்கந்த வர்மன் III 400–436 CE

சிம்ம வர்மன் II 436–460 CE

ஸ்கந்த வர்மன் IV 460–480 CE

நந்தி வர்மன் I 480–510 CE

முராம விஷ்ணு  II 510–530 CE

புத்த வர்மன் 530–540 CE

குமார விஷ்ணு III 540–550 CE

சிம்ம வர்மன்  III 550–560 CE

இதன் பின் கர்நாடக தேசத்தில் இருந்து களப்பிறர்கள் என்னும் மன்னர்கள் தமிழகத்தைக் கைப்பற்றினர்.

அவர்களை விரட்டிவிட்டு மீண்டும் தமிழகத்தை சிம்ம விஷ்ணு என்ற பல்லவன் பிடித்து ஆண்டான்.ஆனால் மகேந்திர வர்மன் 1 அரசன் தான் மிகவும் பலத்துடன் ஆட்சியை செய்தான்.அவன் தான் மாமல்லபுர சிற்பங்களுக்கு அடிகோலினான்.

இவனது மகன் நரசிம்ம வர்மன் தான் மிகவும் புகழ் பெற்ற மாமல்லபுரம் கடற்கரைக் கோயில்களை எழுப்பினான்.

List of later Pallavas:[citation needed]

சிம்ம விஷ்ணு 555–590 CE

மகேந்திர வர்மன் I 600–630 CE

நரசிம்ம வர்மன் 1 [மாமல்லன்] 630–668 CE

மகேந்திர வர்மன் II 668–672 CE

பரமேஸ்வர வர்மன் I 672–700 CE

நரசிம்ம வர்மன் II 700–728 CE - காஞ்சிபுரம் கைலாச நாதர் கோயிலையும், மாமல்லபுரம் கடற்கரைக் கோயில்களைக் கட்டினான்.

பரமேஸ்வர வர்மன் II 705–710 CE

நந்தி வர்மன் II 732–796 CE

தண்டி வர்மன் 775–825 CE

நந்தி வர்மன் III 825–869 CE

அபராஜித வர்மன் 882–897 CE

தொழில்கள்

ஆறுகள், கிணறுகள், குள‘க்கள், கால்வாய்கள் மூலம் மழை நீரை சேகரித்து விவசயாத்துக்கு முக்யத்துவம் தந்தனர். விவசாயம், களிமண் வேலை, தச்சர்கள், பொற்கொல்லர்கள், தானியங்கள் விற்றல் போன்ற தொழில்களுக்கு மிக்க முக்யத்துவம் தரப்பட்டன.அரசின் அனுமதி பெற்று அவற்றைச் செய்ய வேண்டும்.வரியும் செலுத்த வேண்டும்.

கோயில் கட்டிடக் கலைக்குப் பல சிற்பிகள் வரவழைக்கப்பட்டனர்.அவர்களுக்கு நீண்ட கால வேலை வாய்ப்புகள் தரப்பட்டன.

கலைகள்

சிற்பம், ஓவியம், நடனம், இசை, நாடகம், இலக்கியம் ஆகியன மிகவும் ஊக்குவிக்கப் பட்டன. குறிப்பாக இசையையும் நாட்டியத்தையும் கொண்டே ஆன்மீக பக்தியை மக்களுக்கு அளித்தனர்.குறிப்பாக நடனத்தில் பல அழகிய தோற்றப்பொலிவுகளை - postures சிற்பங்களில் காட்டினர்.

அதனால் தான் பல்லவர்களின் குடைவரைக் கோயில்களில் பெரிய பரந்த மேடை போன்ற அமைப்பை உருவாக்கினர்.மஹாபாரத காலத்தின் த்ரோணரின் வழித்தோன்றல்கள் எனத் தங்களைக் கூறிய பல்லவர்கள், மஹாபாரதத்திற்கு முக்கிய இடம் தந்தனர்.

”ப்ருதாஸ்” என்ற இசை வகை மூலம் அரசனின் புகழைப் பாடும் கலையை உருவாக்கினர்.

பல்லவர்களின் ஆன்மீகம்

”சான்” என்ற புத்தமத ஆன்மீக மார்கத்தை உருவாக்கியவன் போதிதர்மன் என்ற பல்லவ இளவரசன் ஆவான்.

வேத வழிச் சமயங்களுக்கு மிகவும் ஊக்கம் தந்தனர் பல்லவர்கள்.

மகே‘ன்திர வர்மன் 1 ஆரம்ப காலத்தில் சமண மதத்தை ஏற்றான்.அப்பரின் வழிகாட்டலின் பேரில் சைவத்தை ஆதரித்தான்.

வேத வழிச் சடங்குகள் செய்யும் அந்தணர்களுக்குப் பல ஊர்களை தானம் செய்தனர்.

அஸ்வமேதம், ராஜ்யசூயம் போன்ற பெரிய யாகங்கள் செய்தனர்.

புத்தம் , சமணம் - சா‘க்கியம் ஆகிய மதங்களையும் ஏற்று மரியாதை செய்தனர்.

80 கோயில்களும், 100 புத்த மடங்களும் காஞ்சியில் இருப்பதாக ஹ்வாங் ஸ்வாங் கூறுகிறார்.

பல்லவர்களின் கட்டிடக் கலை

கற்பாறைகளைக் குடைந்து செய்த மண்டபங்கள், கோயில்கள், விமானங்கள், குகைக் கோயில்கள் இவர்களால் அறிமுகம் செய்யப் பட்டன.

முழுக்க முழுக்கக் கருங்கற்களால் ஆன கோயில் அமைப்புகளுக்கு அடிகோலிட்டவர்கள் பல்லவர்கள்.

ஒரே பெரிய பாறையை முழுக் கோயிலாக மற்றும் திட்டத்தையும் அறிமுகம் செய்தனர்.

புராணச் செய்திகளை விளக்கும் சிற்பங்களை அறிமுகம் செய்தனர்.

அதன் மூலம் ஆன்மீகக் கல்வியை மக்களுக்கு அளித்தனர்.

தமிழ் மொழிக்கு மரியாதை

பல்லவர்கள் காலத்தில் சைவ வைஷ்ணவ பக்தி இயக்கம் மூலம் ஆழ்வார்களும் நாயன்மார்களும் ஊர் ஊராகச் சென்று, தமிழில் இறைவனைப் போற்றிப்பாடி மக்களுக்கு ஆன்மீக அறிவை அளித்தனர்.இதைப் பல்லவர்கள் ஆதரித்தனர்.

Sakthi Foundation

Uni5 education - முதுமக்கள் தாழி

மிகப் பழங்காலத்தில் இறந்தவர்களை மிகப்பெரிய சுடுமண் தாழிகளில் இட்டு பூமிக்குள் புதைக்கும் வழக்கம் தமிழகத்தில் இருந்தது.

இத்தகைய பல தாழிகளை 1899-1904 ஆண்டுகளில் ஆங்கில வரலாற்றுத் தொல்லியல் புதைபொருள் ஆய்வாளர் திரு.அலெக்ஸேண்டர் டே அவர்கள் திருநெல்வேலிக்கருகில் தாமிரபரணி ஆற்றின் ஓரத்தில் ஆதிச்சநல்லூர் என்ற ஊரின்கண் அமைந்துள்ள ஆதி கால சுடுகாட்டுப் பகுதியில் கண்டுபிடித்தார்.

இதன் மூலம் பழந்தமிழக மக்களின் வாழ்க்கை, பண்பாடு, வரலாறு போன்றவற்றை அறிய முடிந்தது.தமிழகத்தின் பல பகுதிகளிலும் இத்தகைய தாழிகள் கிடைத்துள்ளன.

அதனால் ஆதிச்சநல்லூருக்குத் ”தமிழகத்தின் மொஹஞ்ஜதாரோ” என்ற பெயரை அவர் சூட்டினார்.

இறந்தவர்களுடைய சில முக்கியமான பொருட்கள் சுடுமண் தாழிக்குள் வைத்துப் புதைக்கப்பட்டன.

அவை:

நெல், சிறிய மண் பாண்டங்கள், போர்க்கருவிகள், நாணயங்கள், இரும்பு விளக்குகள், தங்கம்-செம்பு-வெங்கலப் பாத்திரங்கள், அணிகள், சந்தனம் அரைக்கும் கல், அம்மிக்கல், பூச்சாடிகள், கிண்ணங்கள், குடுவைகள்.

தாழிகளில் கொப்பூள்கொடியின் மாதிரி செதுக்கப்பட்டு இருக்கிறது.இது அடுத்த பிறவியில் இறந்தவருக்கு நல்ல பெற்றோர்கள் கிடைக்க வேண்டும் என்பதைக் குறிக்கிறது.

தாழிகளில் இறந்தவர்களின் பெயர்கள் ப்ராமி எழுத்துகளில் எழுதப்பட்டுள்ளன.

ஆதிச்சநல்லூர் முதுமக்கள் தாழிகள் சுமார் 4000 ஆண்டுகளுக்கு முற்பட்டவை.

போர்க்கருவிகள்:

வாள், அம்பு, வில், குத்தீட்டி, குறுவாள், அரிவாள், ஏர்க்கொப்பு [உழவுக் கருவி], கோடரி ஆகியன கிடைத்துள்ளன.

அழகான வேலைப்பாடுகள் கொண்ட மண் கலங்களும் பல கிடைத்துள்ளன.

இவற்றின் மூலம் மக்களின் வாழ்க்கையைப் பற்றி என்னென்ன புரிந்து கொள்ள முடிகிறது என்பதைக் கலந்துரையாடல் செய்வது மிக அவசியம்.இதையும் ஈஜிப்ட் ப்ரமிட்களின் மமிகளையும் ஒப்பிடுக.

Sakthi Foundation

Uni5 education

மாமல்லன் நரசிம்ம வர்ம பல்லவன்

பல்லவ மன்னர்களில் மிகவும் ப்ரஸித்தி பெற்ற  ஒருவன் முதலாம் நரசிம்ம வர்மன்.

இவனது ஆட்சிக் காலம் கி.பி. 630 - கி.பி. 668 வரை ஆகும்.

இவன் காஞ்சிபுரத்தைத் தலைநகரமாகக் கொண்டு பல்லவ தேசத்தை ஆண்டான்.

இவனது தந்தை மகேந்திர வர்மன்.இவன் மிகவும் கலா ரசிகன். இசையும், நாடகமும், ஓவியமும், சிற்பமும் இவனுக்கு மிக மிகப் பிடிக்கும்.அதைப் போலவே அவன் மகன் நரசிம்ம வர்மனும் வளர்ந்தான்.

தன் தந்தை மிக்க ஆர்வத்துடன் ஆரம்பித்த மாமல்லபுர சிற்ப வேலைப்பாடுகளை இவனும் தொடர்ந்தான்.ஆனால் போரின் காரணமாக இவனாலும் முற்றிலும் அவற்றை முடிக்க முடியவில்லை.

சாளுக்கிய மன்னன் இரண்டாம் புலிகேசி கி.பி. 642ஆம் ஆண்டில் நடந்த போரில் மகேந்திர வர்மனைத் தோற்கடித்தான்.அதனால் மன்னன் மிக மிக மனம் கலங்கிய நிலையில் நரசிம்ம வர்மன் அரச பொறுப்பை ஏற்றுக் கொண்டான்.

நரசிம்மன் இளம் வயதிலேயே வீர விளையாட்டுகளில் ஒன்றான மல் யுத்தத்தில் நல்ல தேர்ச்சி பெற்று விளங்கினான்.பல போட்டிகளிலும் வென்று மக்களால் ”மாமல்லன்” என்று சிறப்புடன் அழைக்கப்பட்டான்.

இவனது ஆட்சிக் காலத்தில் தான் சைனா யாத்ரீகர் ஹ்வாங் ஸ்வாங் காஞ்சிபுரத்துக்கு வருகை புரிந்து புத்த மதக் கருத்துக்களைக் கற்றுச் சென்றார்.அவரது பயணக்குறிப்புகளில் பல்லவ தேசம், மக்கள் வாழ்க்கை, மன்னனின் பெருமை, காஞ்சியின் அழகு போன்றவை பதிவாகி உள்ளன.

சிவ பெருமானின் பக்தனான இவன் காலத்தில் அப்பர், ஞானசம்பந்தர் ஆகியோர் வாழ்ந்தனர்.அவர்களின் வழிகாட்டலில் பேரில் அவன் பல சிவன் கோயில்களையும் எழுப்பினான்.

பாரத தேசத்தின் மிக முக்கியமான வீரம் மிக்க அரசர்களில் ஒருவனாக இவன் கருதப்படுகிறான்.போரில் ஒரு போதும் இவன் தோல்வியே கண்டதில்லையாம்.

தமிழ் மொழியையும் சமஸ்க்ருதத்தையும் மிகவும் ஆதரித்தவன் இவன்.புத்தம், சமணம், சாக்கியம், சைவம், வைஷ்ணவம் ஆகிய மதங்களையும் ஒன்று போல் மதித்தான்.இவன் காலத்தில் காஞ்சியில் அம்மதத்தைக் கற்றுத் தரும் மடங்களும் இருந்தன.

சம்ஸ்க்ருத மொழிக்கு உயர்ந்த இலக்கணத்தை எழுதிய தண்டி இவன் காலத்தில் காஞ்சியில் தான் வாழ்ந்தார். சிற்பக்கலை மூலம் மக்களுக்கு இவன் செய்த கலை சேவைப் பாராட்டி தண்டி இவனை ”விசித்திர சித்தன்” என்று அழைத்தார்.

பாரத தேசத்தின் மிக உயர்ந்த குருமார்களில் ஒன்றான ஸ்ரீமத் ஆதிசங்கரர் இவன் காலத்தில் தான் காஞ்சி காமகோடி பீடத்தை உருவாக்கினார்.

தன் தந்தையை வெற்றி கண்டு காஞ்சிபுரத்தை சீரழித்த இரண்டாம் புலிகேசியை இவன் மணிமங்கலம் என்ற ஊரில் துரத்தித் துரத்தி வெற்றி கண்டான். சென்னை - தாம்பரத்தின் மேற்கில் பத்து கி.மீ தொலைவில் உள்ளது.

ஆனால் அதன் பின்னும் புலிகேசி தொல்லை தந்ததால் குஜராத்தில் அவனது தலைநகருக்குச் சென்று ஒரு ஆண்டுக் காலம் போராடி வெற்றி கொண்டான் [கி.பி.642].அதனால் மக்கள் அவனை ”வாதாபி கொண்டான்” என்று புகழ்ந்தனர்.

அவ்வூரில் மல்லிகார்ஜுன சிவன் கோயிலை எழுப்பினான்.மேலும் அவ்வூரில் உள்ள தெங்கின இரப்ப கோயிலின் சுவற்றில் தன் வெற்றியைக் கல்வெட்டாகப் பதிவு செய்தான்.

அப்போது அவனுக்கு உற்ற ராணுவ வீரனாக விளங்கியவன் அவனது அருமை நண்பன் பரஞ்சோதி.அவன் இம்மன்னனை மத யானையிடம் இருந்து காப்பாற்றியவன் ஆவான்.இவர்களது வரலாற்றை அழகான நாவல் வடிவில் எழுதியவர் ஸ்ரீ.கல்கி.அதன் பெயர் சிவகாமியின் சபதம். தமிழில் மிகச் சிறந்த சரித்திர நாவல்களுள் ஒன்று இதுவாகும்.

நரசிம்ம வர்மனின் மற்றொரு நண்பன் இலங்கை வீரன் மானவர்மன்.இவனும் வாதாபிப் போரில் உதவினான்.அதற்கு நன்றியாகப் பல்லவ படையுடன் அவன் இலங்கைத் தீவை வேறு அரசனிடம் இருந்து மீட்டு ஆண்டான்.

நரசிம்மன் வீரம் பற்றிய செய்திகள்...

”வாதாபி என்ற அரக்கனை அகஸ்தியர் வினாயகரின் அருளுடன் வென்றது போல் நரசிம்ம வர்ம பல்லவன் வாதாபியை வென்றான்” - கல்வெட்டுச் செய்தி - பரமேஸ்வர வர்ம பல்லவன் எழுதியது.

”அகஸ்தியர் போல ஞானம் உள்ள நரசிம்ம வர்மன் வாதாபியை மிதித்துப் பொடியாக்கினான்”  - உதயச் சந்திர மங்கலம் செப்பேடுகள்.

”மஹாவிஷ்ணுவைப் போல் வீரம் கொண்டு, வாதாபியை வெற்றி கொண்டு அவ்வூரின் நடுவில் விளங்கிய வெற்றித் தூணை நரசிம்ம வர்மன் சாய்த்தான்” - வேலூர்ப்பாளையம் செப்பேடுகள்.

வாதாபி அரசன் சின்னமான காட்டுப்பன்றி தன் கோயில் குளத்தில் நீர் அருந்துவது போல் மாமல்லன் கடற்கரைக் கோயிலில் சிற்பமும் கோயில் குளமும் செய்துள்ளான்.

Sakthi Foundation

மூன்றாம் நந்தி வர்ம பல்லவன் [கி.பி 847 - 872 ஆட்சிக்காலம்]

பல்லவ மன்னர்களில் புகழ் பெற்ற பலருள் ஒருவன் மூன்றாம் நந்தி வர்ம பல்லவன்.

இவனும் காஞ்சிபுரத்தைத் தலைநகராகக் கொண்டு ஆண்டான்.

இவன் 63 சிவ பக்தர்களான நாயன்மார்களில் ஒருவராக மதிக்கப் படும் அளவுக்கு உண்மையான பக்தி, சமூஹ சேவை, மக்கள் நலம் ஆகியவற்றில் கவனம் கொண்டான்.

இவன் காலத்தில் பல ஆன்மீக அன்பர்களும் வாழ்ந்தனர்.

இவனுடைய தந்தை தந்தி வர்ம பல்லவன், தாய் அக்கள நிம்மதி.

தாயையும் தந்தையையும் சிவபார்வதியாகவே பாவித்து, அவருள் இருக்கும் தெய்வீகத்தை மதித்தவன் இம்மன்னன்.

”முப்புரம் எரித்த சிவனுக்குப் பார்வதி மனைவியானது போல, தந்தி வர்மனுக்கு மனைவியானாள் அக்கள நிம்மதி.

விடியற்காலையில் சூரியன் உலகிற்கு ஒளியை வாரி வழங்குவது போல, சிவனுக்குப் பார்வதி அழகிய சக்திவேலை உடைய முருகனைத் தநத்து போல், இந்திரனுக்கு அவன் மனைவி சசி தேவி ஜெயந்தனைப் பெற்றதைப் போல் அக்களை நந்தி வர்மனை உலகின் நலனுக்குப் பெற்றாள்” என்று வேலூர்ப்பளையம் செப்பேடு [copper plate inscriptions] கூறும்.

ஊருக்கு ஏற்ற பிள்ளை..

தாயும் தந்தையும் நல்லதொரு குழந்தையை உலகிற்குப் படைத்து அதன் மூலம் சமூஹ நலனைக் காக்க வேண்டும் என்பதே கந்தபுராணம்.அதை உணர்த்தும் இல்லற ஸ்தலமே காஞ்சிபுரம்.அவ்வூரின் மன்னன் உலகிற்கு நம்மை செய்தான்.பெயருக்கு ஏற்ப அவன் அன்னை நிம்மதி கொண்டாள் என்பதில் ஐயமே இல்லை!தாய் தந்தையரின் முதல் கடமை - பெற்ற குழந்தையை நல்லவராக வளர்த்தல்.

அமைதியையே பெரிதும் விரும்பிய மன்னன்

வரகுண பாண்டியன் மதுரையில் இருந்து வந்து பல்லவருக்கு உட்பட்ட சோழ தேசத்தின் சில பகுதிகளைக் கைப்பற்றினான்.இதை அறிந்த நந்தி வர்மன் அப்பாண்டியனுடன் தெள்ளாறு என்ற ஊரில் மிக பயங்கரமான போர் செய்தான்.பாண்டியனை காரைக்கால், திருநள்ளாறு ஆகிய ஊர்கள் வழியே மதுரை வரை துரத்திச் சென்றான், வெற்றி கண்டான்.அவனது மகள் மாறன்பாவை என்பவளைக் கல்யாணம் செய்தான்.வீரக்கழல் அணிந்த சிங்கம் போல் போரிட்டதால் அவனை மக்கள் ”கழற்சிங்கன்” என்றும் புகழ்ந்தனர்.

இதைப் புகழ்ந்தே அவனுக்கு ”தெள்ளாற்று எறிந்த நந்தி வர்ம பல்லவன்” என்ற விருது ஏற்பட்டது.அவனது வீரப்போரைப் புகழ்ந்து வர்ணிக்கும் நந்திக் கலம்பகம் என்ற தமிழ் இலக்கியமும் எழுதப்பட்டது.வேறு சில போர்களும் இவன் செய்தான்.

சுந்தரரின் ஆன்மீக மாணவன்

இப்போருக்குப் பின் அவன் அமைதியான வழியில் தேசத்தை ஆண்டான்.

திருநாவலூர் சிற்றரசர் நரசிங்க முனையரையர் இவனது நெருங்கிய அன்பர்.இவரே சுந்தர மூர்த்தி நாயனாரின் வளர்ப்புத் தந்தை.சுந்தர மூர்த்தி நாயனாரின் ஆன்மீக வழிகாட்டல் நந்தி வர்மனுக்கு மிக அதிகம் கிடைத்துள்ளது.

அதே போல் இப்பல்லவ மன்னனின் சேனைத்தலைவர் கோட்புலியார்.இவரும் மிக உயர்ந்த சிவ பக்தர்.

சுந்தர மூர்த்தி நாயனார் சேரமான் பெருமாள் நாயனாருடன் சேர்ந்து ஆன்மீகப் பயணம் செய்து, சைவ சமயத்தின் பக்தி நெறியைப் பரப்பினார்.

அவர் தான் முதன்முதலில் சைவ அடியார்களின் வரலாற்றைத் ”திருத்தொண்டத்தொகை” ஆகப் பாடினார்.அதில் நந்தி வர்மனைக் கழற்சிங்கன் எனவும், கோட்புலியையும், நரசிங்க முனையரையாரையும் சேர்த்தார்.

63 நாயன்மார்களில் இவர்கள் இடம் பெறும் தகுதியை இவர்கள் இம்மன்னனுடன் இணைந்து பெறும் அளவுக்குத் தகுதியை வளர்த்துக் கொண்டுள்ளது தேசத்தின் ஆன்மீக அமைதி வளர்ச்சியைக் காட்டுகிறது.வேறு சில சைவ அன்பர்களும் இவர் காலத்தில் வாழ்ந்தனர்.

இவன் காலத்து வரகுண பாண்டியன் தான் மாணிக்கவாசகரின் அரசன்.

எனவே மாணிக்க வாசகர், மதுரைப் பாணபத்ரர் ஆகியோரும் இவன் காலத்தே வாழ்ந்தனர்.

மன்னர்கள் போரைத் தவிர்த்து அதிகம் அமைதியான வாழ்வில் நாட்டம் காண பக்தி மார்க்கம் பெரிதும் உதவியது எனலாம்.

நீதி வழுவாத நந்தி வர்ம பல்லவன்

இம்மன்னன் தன் ராணியுடன் ஒரு முறைத் திருவாரூர் ஸ்ரீத்யாகராஜ ஸ்வாமி கோயிலுக்குச் சென்றான்.அங்கு கோயிலைச் சுற்றி வருகையில் அவன் ராணி நந்தவனத்தில் இருந்த ஒரு அழகிய பூவை எடுத்து அதன் வாசனையை அனுபவித்தாள்.இதனால் கோபம் கொண்ட செருத்துணையார் என்ற சிவ அன்பர் ”ராணி! இறைவனுக்கு மட்டும் என உள்ளதை உங்களைப் போன்ற உயர் மக்கள் எடுத்து அனுபவித்தால் மகக்ளுக்கும் கோயில் பொருட்களில் கை வைப்பார்களே! இதை யோசிக்கவில்லையா? வேறு ஆளாக இருந்தால் கைகளை வெட்டி இருக்கும் அளவு தண்டிக்கப்பட வேண்டும்.அப்போது தான் மக்கள் கோயில் சொத்தில் கை வைக்க மாட்டார்கள்” என்று கூறினார்.

இதை அறிந்த நந்தி, ”சரியாகச் சொன்னீர், வாசனை அனுபவித்த மூக்கையும் அல்லவா அரிய வேண்டும்?” என்று தன் மனைவி, ராணி என்ற பற்று இல்லாமல் நீதியைப் பேசினான்.

இதை அறிந்த சுந்தரர் மன்னனை,

”கடல் சூழ்ந்த உலகு எல்லாம் காக்கின்ற பெருமான்

காடவர் கோன் கழற்சிங்கன் அடியார்க்கும் அடியேன்” என்று பாடினார்.

கோயில்களுக்கு மக்களும் மன்னர்களும் எழுதி வைத்துள்ள பொது சொத்துக்களைத் தவறாகப் பயன்படுத்தும் இக்காலத்தவர்க்கு என்ன தண்டனையோ?

நந்தி வர்மன் அதிகம் ஈடுபட்ட கோயில் கலை

சிதம்பரம் கோயிலின் மூலஸ்தானத்துக் கூரை அமைப்பு மாதிரி மாமல்லபுரத்து ரதக்கோயிலில் உள்ளது.இதற்கு ”சாலாகார விமானம்” என்று பெயர்.இவ்வமைப்பை நந்தி பல கோயில்களில் செய்தான்.

திருக்காட்டுப்பள்ளி [செங்கல்பட்டுக்கு அருகில் பொன்னேரிக்கு அருகில் உள்ளது]

இவ்வூரில் உள்ள சிவன் கோயிலை அமைக்க நந்தி வர்மன் நில தானம் செய்துள்ளான்.அக்கோயிலைக் கட்டியவன் யக்ஞ பட்டன் என்ற அந்தணன்.

கிளியனூர்

திண்டிவனம் அருகில் கிளியனூரில் இவன் கட்டிய விஷ்ணு கோவில் இடிந்து இன்று விஷ்ணு சிலை மட்டும் எஞ்சி உள்ளது.அதில் உள்ள கல்வெட்டு, ”ஒய்மா நாட்டுக் கிளிஞலூர் திகைத்திறல் விஷ்ணு க்ரஹம்” என்று கூறுகிறது.

இவருக்கு ”விழுப்பெருந்தாய விஷ்ணு க்ருஹத்து நின்று அருளிய பெருமாள்” என்று பெயர்.

பல்லவர்கள் இசைக்கலையையும் நன்கு ஆதரித்து அதைக் கற்கவும் செய்த காரணத்தால் தான் ஆழ்வார்களும் நாயன்மார்களும் இசை மூலமே மக்களை பக்திக்கு இழுத்தனர்.நந்தியும் இக்கலையை ஆதரித்தான்.

இவன் காலத்தில் சமண புத்த மதங்கள் குறைந்தன.ஆனால் இம்மன்னன் யாரையும் வெறுத்து ஒதுக்கவில்லை!

இலக்கியங்களை ஆதரித்த மன்னன்

நந்தியின் அரசவையில் இருந்த பெருந்தேவனான் மஹாபாரத்தைத் தமிழில் ”பாரத வெண்பா” என்று முழுமையாகப் பாடினார்.

இவன் பெயரில் தான் நந்திக் கலம்பகம் பாடப்பட்டது, ஆனால் புலவர் பெயர் தெரியவில்லை.

சுந்தர மூர்த்தி நாயனாரின் தேவராகப் பதிகங்கள், மாணிக்க வாசகரின் திருவாசகம், திருக்கோவை, சேரமான் பெருமாள் பாடிய பக்தி நூல்கள் ஆகியவற்றை இவன் சேகரித்துப் போற்றிப் பரப்பினான்.

நந்தி வர்மன் செய்த திருப்பணிகள் - தானங்கள்: [சில]

கோயில்களை மையப்படுத்தியே சமூஹப் பணிகள் அமைந்த காலம் அது.எனவே மன்னனும் மக்களும் கோயிலுக்கே தான தர்மங்கள் செய்து அதன் மூலம் ஆதரவு அற்றோர்க்கும் இறைவனுக்கும் பணி செய்தனர்.இம்மன்னன் செய்த பல கோயில் தானதர்மங்கள் கல்வெட்டுகள், செப்பேடுகள், இலக்கியங்கள் மூலம் தெரியவருவதைக் காண்க:

வேலூர் அருகில் பள்ளி கொண்டா கிராமம் - நாகநாதேச்சுவரர் கோயில்

பள்ளிகொண்டாவான வித்தூரில் சிவன் கோயிலில் முகமண்டபத்தை அமனி கங்கரையர் மகன் செல்வ வாணவராயன் கட்டினான்.அமனி கங்கரையர் நந்தியின் ஆட்சியின் கீழ் ஆண்டவர்.

புதுக்கோட்டை - குன்னாண்டார் கோவில் கிராமத்தில் பர்வத கிரீஸ்வரர் கோவிலி

மீபுழை நாட்டு வடுவூர் கணவதிமான் திருவாதிகை விழாவில் 200 சிவ அன்பர்களுக்கு அன்னதானம் செய்ய நெல் தானம் செய்தான்.

திண்டிவனம் - கிளியனூர்

இவ்வூர்ப் பெருமாளுக்கு விளக்கு ஏற்றவும் நைவேத்யத்துக்கும் 300 ஆடுகளும் நிலங்களும் இவ்வூர் மக்களே நந்தி வர்மன் முன் தானம் செய்தனர்.

திருச்சி லால்குடி சப்தரிஷீசுவரர் கோயில்

இறைவன் பணிக்கு நந்தி வர்மன் 60 காசுகளும், இஞ்ஞாட்டு நல்லிமங்கலம் சபை [வழக்குரைஞர்கள்] 20 காசுகளும் அளித்தனர்.

நெல், நெய், நுந்தா விளக்கு எரிய இவை பயன்படுத்தப்படும்.

திருக்கோயிலூர்

நந்தி வர்மனின் ஆட்சிக்கு உட்பட்ட சிற்றரசன் சித்தவடவனார்.இவரது தங்கைகள் இருவர்.மகாதேவடிகள் - வாணகோவதிகள்.இருவரும் சிவன் கோயிலுக்கு நிலங்கள் தந்தனர்.

பொறுப்பில் இருக்கும் மனிதரப் பார்த்தே மக்கள் சமூஹத்தில் வாழ்வர்!

அதற்கு நந்திவர்ம பல்லவன் 3 ஒரு உதாரணம் என்பதை மனதில் கொள்க.

Sakthi Foundation

புலிக்குகை - அதிரண சண்ட சிவன் கோயில் - சப்த மாதர்கள் - முருகன் கோயில்

சென்னையில் இருந்து செல்லும் போதே மாமல்லபுரத்துக்கு முன்பே இடது புறம் சாளுவன் குப்பம் என்ற இடத்தில் புலிக்குகை வருகிறது.அரசு அதன் பெயரை நல்ல பெரிய எழுத்தில் வழிகாட்டி உதவியுடன் வைப்பது அவசியம்.அதை விட  நம் தேசத்து மக்கள் மதுவைக் குடிக்க இப்பகுதியைத் தேர்ந்தெடுத்துள்ள அவலமான மஹா கேவலமான நிலை!

மேலை தேசத்து நாகரீகம் என்ற பெயரில் அங்குள்ள தீய விஷயங்களில் மஹாமோஹம் கொண்டு நாம் நம் கலாச்சாரச் சின்னங்களைச் சீரழிக்கிறோம்.மேலை தேசத்து மக்கள் சுமார் 200 ஆண்டு பழமையையே மிகவும் போற்றக் கூடியவர்கள் என்பதை இந்த மூட ஜனங்கள் கருத்தில் கொள்ள வேண்டும்.

மிகச் சிறிய வயதில் இருந்தே பள்ளிகளி சமூஹ நாகரீகம் மிகவும் வலியுறுத்தப் படுதல் அவசியம்!

ராஜவிம்ம பல்லவன் குடைந்து செய்த அழகிய அமைதியான குகைக்கோயில் தான் புலிக்குகை.

கம்பீரமான சிம்ம முகங்கள் குகையின் நுழைவாசலை அலங்காரம் செய்கின்றன.அவை விழிப்புணர்வின் குறியீடு ஆகும்.

இரண்டு யானைகளும் குதிரையும் வடிக்கப் பட்டு உள்ளன.அவற்றின் மீது சதுரமான மாடத்துள் சிவன் அமர்ந்துள்ளார்.

குகைக்கோயிலின் நடுவில் படிகளின் மீதேறிச் செல்லும் வழி உள்ளது.

முன் மண்டபம் கூடிய கர்ப்ப க்ருஹம் அமைந்துள்ளது, ஆனால் உள்ளே ஒன்றும் இல்லை!

முன்மண்டபத் தூண்களில் சிம்மம், அதன் மீது ஏறிய மாவீரனின் அழகிய சிற்பங்கள் உள்ளன.

பல்லவர்கள் மானுட வாழ்வியல் ஆதார சக்தியை அதிகரிக்கும் சக்தி வழிபாட்டில் ஆழ்ந்த கவனம் செலுத்தினர்.காரணம் மாமல்லபுரத்தில் பல இடங்களில் கொற்றவையாம் துர்கைக்கே அதிகம் சிற்பங்களும் வழிபாட்டு இடங்களும் அமைகின்றன.

புலிக்கோயிலை வலம் வருகிறோம், மேற்கொண்டு வடக்கு நோக்கிச் செல்ல மிக ப்ரம்மாண்ட உயரமான பாறைகள் உள்ளன.என்னென்ன திட்டங்கள் பல்லவர் அதன் மீது வைத்து இருந்தாரோ? உயரத்தில் அதைச் செதுக்க ஆரம்பித்த அடையாள எச்சங்கள் உள.

மேற்கொண்டு பயணிக்க பல பாறைகள், உப்புக் காற்றால் குடையப்பட்டுள்ளன.பல்லவ சிற்பிகளிடம் கடல் காற்று சிற்பக்கலையைக் கற்றுக் கொண்டதோ?

இந்தக் காற்றும், வானும், கடலும் அல்லவா அவர்கள் வேலை செய்த அழகை அனுபவித்து இருக்கும்?

மேலும் சென்றால் மற்றொரு குகைக்கோயில், இன்று வழிபாட்டில் உள்ளது.

அதுவே அதிரணசண்ட குகைக்கோயில்.

இது சிவன் கோயில்.

இதை ராஜசிம்ம பல்லவன் செய்தான் என்று பாறைக் கல்வெட்டுகள் கூறுகின்றன.

ராஜராஜ சோழன் காலத்தில் இக்கோயில் வழிபாட்டில் இருந்துள்ளது என்று தரையின் மீது பாறைக்கல்வெட்டு கூறும்.

”கயிலை மலையைப் போலும் இமய மலையைப் போலும் மிக அழகான உயர்ந்த கோயிலை ராஜசிம்மன் உலக நலனுக்காக ஈஸ்வரனுக்குச் செய்தான்” என்று கல்வெட்டு கூறுகிறது.

கர்ப்ப க்ருஹத்தில் எண் கோணப்பட்டை லிங்கம் மிளிர்கிறது.பின்புறச்சுவற்றில் பல்லவருக்கே உரிய styleஆன சோமாஸ்கந்த மூர்த்தி!

வெளிப்புறத்து இரு பக்கங்களிலும் சோமாஸ்கந்தர் உள்ளனர்.

கோயிலின் வெளியே மிக நீண்ட பாண லிங்கம் இன்று கொடிமரமாகத் தவறாக நடப்பட்டு உள்ளது.

அதன் அருகில் பல்லவரின் நந்தி இருபிளவாய்ச் சேர்க்கப்பட்டு பூஜையில் உள்ளது.

கோயிலின் சேதமான சில கல்பகுதிகளைச் சுற்றி வைத்துள்ளனர்.அதில் மிகவும் கவனத்தில் கொள்ள வேண்டிய ஒன்று உடைந்து போன தலை அற்ற மிகப் பெரிய இறைவன் சிலை.அதை ஒரு ஓரத்தில் கிடத்தி உள்ளனர்.அது சற்று தொலைவில் உள்ள முருகன் கோயிலின் மூல விக்ரஹமாக இருந்திருக்க வாய்ப்பு உண்டு.

சிவனை வணங்கி நந்தியின் வலது புறப்பறையில் பார்த்தால் மிகவும் நுட்பமான துர்கை மகிஷனுடன் போரிடும் தேவி மஹாத்மிய காட்சி வடிக்கப்பட்டு உள்ளது.தேவியின் வீர கம்பீர சிம்மவாஹினித் தோற்றமும், அசுரன் ”ஐயோ என்னை வதைத்தது போதும்!” என்று கை ஜாடை காட்டுவதும், பூத கணங்கள் அவனை வதைப்பதும், குறிப்பாக ஒரு பூதம் அவன் கையைக் கடிப்பதும் வர்ணிக்க முடியாத கல்லோவியம்!

அடுத்து உள்ள ஓட்டுக்கூரைக் கோயிலுக்குள் அத்துர்கையின் சப்த மாதர்கள் உள்ளனர்.

அடுத்து வேலியை விட்டு வெளியே வரும் போது 2004 சுனாமி காட்டிக் கொடுத்த பல்லவர் கால முருகன் கோயில் அகழ்ந்து எடுக்கப்பட்டு உள்ளதைக் காணலாம்.சுடுமண் செங்கல், பரந்த பெரிய மண் கற்கள், கருங்கற்கள் கொண்டு ஒரு பாறையை ஒட்டி இக்கோயில் அமைகிறது.

நீண்ட வேலாயுதம் நடப்பட்டு உள்ளது.சில உடைந்த கற்களும் கோயில் பகுதிகளும் கவனம் இல்லாமல் உள்ளன.

சிவன், துர்கை, முருகன் என மூன்று பெரிய தெய்வங்களுக்கும் வழிபாடு செய்த மக்களின் சமயநெறியும், பல்லவனின் சிற்பக் கலை ஈடுபாடும், பக்தியும் சிந்திக்க உரியவை.

எதை கொண்டு செதுக்கினர்?

எதைக் கொண்டு அளந்தனர்?

எதைக் கொண்டு தீட்டினர்?

எத்தனை காலம் பாடுபட்டனர்?

எத்தனை பேர் உழைத்தனர்?

என்னவெல்லாம் திட்டம் வைத்து இருந்தனர்?

எவர் எல்லாம் மேற்பார்வை பார்த்தனர்?

எதை எல்லாம் த்யாகம் செய்தனர்?

மன்னன் என்ன கூலி தந்தான்?

இதை எல்லாம் யோசித்தால் அப்பகுதியைத் தூய்மையாக வைக்கச் சில முட்டாள்களுக்கு அணு அளவேனும் அறிவு வரும்!

I thank the photographer[?] who helped me to repair my camera and guard who directed me to excavated Murugan temple today.

Dr.M.Madeswaran., Madras, 6.2.2015

Sakthi foundation

மாமல்லபுரம்

நெர்பேயாறு

பெரும்பாணாற்றுப் படை என்பது 2000 ஆண்டுகளுக்கு முன் எழுதப்பட்ட சங்க இலக்கியம்.இதில் பல்லவ தேசம் ”தொண்டை நாடு” என்று பெயரிடப்படுகின்றது.அதன் தலைநகரம் காஞ்சிபுரம் என்றும், அதை இளந்திரையத் தொண்டைமான் ஆண்டான் என்றும் கூறப்படுகின்றது.அவனது துறைமுகம் நெர்பேயாறு என்று கூறப்படுகின்றது.இதுவே இக்கால மாமல்லபுரம்.

கடல் கடந்த வாணிபம்...

ரோம், சைனா, இலங்கை, அரேபியா, சுமத்ரா, ஜாவா, இந்தோனேஷியா ஆகிய நாடுகளுடன் கடல் வாணிபம் செய்தனர் பல்லவர்கள். அவர்களின் துறைமுகம் இவ்வூர் ஆகும்.மிகப்பெரிய மரக்கப்பல்கள் மூலம் கடல் பயணம் மேற்கொண்டனர். கி.பி நான்காம் நூற்றாண்டின் சைனா காசுகளும், முதலாம் தொடோஸியஸ் என்ற ரோம் அரசன் காலத்துக் காசுகளும் இங்கு கண்டு பிடிக்கப் பட்டன. ஸ்ரீஹரி, ஸ்ரீநிதி என்று பெயர் பொறித்த பல்லவக் காசுகளும் கிடைத்துள்ளன.

கி.பி முதல் நூற்றாண்டில் பெரிப்ளூஸும்,  கி.பி 142ல் டோலமியும் இவ்வூரைப் பற்றிய தகவல்களைத் தங்கள் பயணக் குறிப்பேட்டில் பதிவு செய்துள்ளனர்.மிகச் சிறந்த கடல் வாணிப ஸ்தலத் துறைமுகமாக இவ்வூர் விளங்கியது.

மல்லை, கடல் மல்லை என்ற பெயர்கள் இவ்வூருக்கு உண்டு.கடல் வழி மூலம் பல பொருட்கள் மலிந்து வியாபாரத்துக்கு வருவதால் மல்லை என்று பொருள் கொள்ளலாம்.

புனித பூமி...

108 வைஷ்ணவ திவ்ய தேசங்களில் ஒன்று மாமல்லபுரம். வைஷ்ணவ ஆழ்வார்களில் பூதத்தாழ்வார் இவ்வூரில் பிறந்தவர் ஆவார்.இவரது காலம் கி.பி.5ஆம் நூற்றாண்டு ஆகும்.ஒன்பதாம் நூற்றாண்டில் திருமங்கை ஆழ்வார் இவ்வூரின் ஸ்தல சயனப் பெருமாள் மீது பதிகங்கள் பாடி இருக்கிறார்.அவரது காலத்தில் கடற்கரைக் கோயில்களில் வழிபாடுகள் நிகழ்ந்துள்ளன. ”சுடுகாட்டில் வாழும் சிவனுடன் கூட இருக்கும் பெருமாள்” என்ற அர்த்தத்தில் அவர் கடற்கரைக் கோயில் இறைவனைப் புகழ்கிறார்.

இக்கோயில் பல கடல் சீற்றங்களால் பாதிக்கப்பட்ட நிலையில் ஐந்நூறு ஆண்டுகளுக்கு முன் நாயக்க மன்னர்கள் இப்போது ஊரின் நடுவில் உள்ள பெரிய கோயிலை ஏற்படுத்தினர்.அதில் பூதத்தாழ்வாருக்குத் தனி சன்னிதியும் உள்ளது. பூமிக்கு மரியாதை செய்யும் வகையில் இக்கோவில் தாயார் ஸ்ரீநிலமங்கை நாச்சியாராக அருள் பாலிக்கிறார்.

உண்மை!

தன் பிள்ளைகளுக்கு விசேஷமாகத் தன் மடியில் தின்பண்டங்களைக் கட்டி வைத்திருக்கும் தாயைப் போல் பூமித் தாய் தன் கடற்கரையில் பல்லவர்களுக்கு என்றே பாறைகளை வைத்துக் காத்திருந்தாள் என்று வர்ணிக்கலாம்.

கடற்கரைக் கோயில்கள்...

மாமல்லபுரம் என்று காதில் விழுந்தவுடன் மனக்கண்களில் தெளிவாகக் காட்சிக்கு வருவது கடற்கரைக் கோவில்கள்.

இவை கி.பி 700 - 728 கி.பி காலத்தில் செதுக்கப்பட்டுள்ளன.

இவற்றை உருவாக்க முன்னோடியானவன்  நரசிம்ம வர்ம பல்லவன் 1.

ஆனால் முழுமை பெற்றது இரண்டாம் நரசிம்ம வர்மனால் தான்.இவனின் மற்றொரு பெயர்தான் ராஜ சிம்ம பல்லவன்.

மார்கோ போலோ இவ்வூரை வந்து காண்கையில் கடற்கரையில் ஏழு கோயில்கள் இருந்ததாகக் குறிப்பிடுகிறார்.இன்று இரண்டு மட்டுமே உள்ளன. 2006ல் சுனாமி வருவதற்கு முன் கடல் உள்வாங்கிய போது, கடல்படுக்கையில் சில கோயில்களின் மேல் பாகங்கள் காணப்பட்டன.இவற்றை நரசிம்மவர்மன் 2 எழுப்பியுள்ளான்.

மேலும் கடலால் பாதிப்பு ஏற்படாத வண்ணம் தற்காலத்தில் கற்பாறை அரண்  [பாதுகாப்பு] போடப்பட்டுள்ளது.

2004 சுனாமிக்கு முன் கடல் உள்வாங்கிய போது ஐரோப்பிய கடல் பயணிகள் குறிப்பிட்ட ஏழு கோவில்களில் மூழ்கிய கோவில்கள், மயில், சிம்மம், யானை, குதிரை போன்ற கற்சிற்பங்களும் கடற்படுக்கையில் தென்பட்டுள்ளன.

பழங்காலத் துறைமுகம்...

கோவிலுக்கு முன் அகழ்ந்து எடுக்கப் பட்ட துறைமுகத்தின் சில பகுதிகளைக் காண முடியும்.குறிப்பாகக் கப்பல்களை, ஓடங்களைக் கட்டும் இடத்தைக் காணலாம்.

கடலில் தன்மை, இடம் இத்தனை நூற்றாண்டுகளில் மாறுபட்டிருக்கின்றது.

தெப்பக்குளம் அதன் நடுவில் மண்டபம் என்ற கோவில் குள அமைப்புக்கு முன்னோடியாக ஒரு அழகிய கல் தளம் போடப்பட்ட நீர்க்குளம் அமைகிறது.அதன் நடுவில் சிறிய மண்டபமும், பெரிய வராகமும் [காட்டுப்பன்றி] உள்ளன.

இதை வராஹ அவதாரம் என்று காண்பதை வித, சாளுக்கியர்கள் பல்லவர்கள் குளத்தில் தண்ணீர் குடிக்கிறார்கள் என்ற போர் வெற்றிச் சின்னமாக மனதில் பதிகிறது.

”தண்ணீர் குடிக்க வச்சிட்டான்”என்ற பழமொழியை இவ்விடத்தில் கருத்தில் கொள்க.

1. ஷத்ரிய சிம்ஹ பல்லவேச்வர க்ருஹம் [ஷத்ரிய சிம்மேஸ்வரன் என்பது சிவனைக் குறிக்கும்]

2. ராஜ சிம்ஹ பல்லவேச்வர க்ருஹம்

3. பள்ளி கொண்டு அருளிய தேவர் க்ருஹம் [ஸ்தல சயனப் பெருமாள்]

4. நரபதி சிம்ஹ க்ருஹம் என்ற பெயரில் ஒரு கோவில் இருந்துள்ளது. அதில் நரசிம்மர் இருந்திருக்கக் கூடும்.

என மூன்று கோவில்களின் பெயர்களைக் கல்வெட்டுகள் குறிப்பிடுகின்றன.

”யானைகளும், நவமணிகளும் ஏற்றுமதிக்காகக் குவிந்திருக்கும் கப்பல்கள் மிதக்கும் கடல் மல்லை”என்று திருமங்கை ஆழ்வார் குறிப்பிடுகிறார்.

கடற்கரைக் கோயில்களில் 16 பட்டை சிவலிங்கமும் ஸ்தல சயனப் பெருமாளின் ப்ரமாண்டமான கிடந்த கோலமும் உள்ளன.இம்மூர்த்திகளை ஆழ்வார் குறிப்பிடுகிறார்.

கோவில்களைச் சுற்றி அரணாகக் கற்பாறைச் சுவர்களும், அவற்றில் நந்திகளும் அமைந்துள்ளன.

மகேந்திர வர்மனும் முதலாம் நரசிம்ம வர்மனும், இரண்டாம் நரசிம்ம வர்மனும், ராஜ சிம்ம வர்மனும் இவ்வூரில் உள்ள பல கலை வேலைப்பாடுகளை உருவாக்கி உள்ளனர்.

புத்த விஹாரங்களின் மாதிரிகளைக் கொண்டு கோயில்கள் மாற்றி வடிவமைக்கப்பட்டன. அஜந்தா எலோரா குகைக் கோயில்களை ஒத்த குகைக் குடை வரை மண்டபங்கள் அமைகின்றன.வாதாபிப் போருக்குப் பின் அங்கிருந்த பல சிற்பிகளை நரசிம்ம வர்மன் தமிழகம் அழைத்து வந்து, அவர்களின் கூட்டமைப்பில் பல கலைப்பாடுகளை உருவாக்கி இருக்கிறான்.

சைவ வைஷ்ணவ சமய வளர்ச்சிக்கு மாமல்லபுரம் குகைக் கோயில்கள் மிகவும் உறுதுணை செய்கின்றன.

அவனுக்குப் பின்னர் ராஜ சிம்ம வர்மனும், பிற்காலச் சோழர்களும், நாயக்க மன்னர்களும் சில வேலைகளைச் செய்துள்ளனர்.

ஒரே கற்பாறையால் செதுக்கி உருவாக்கப்பட்ட MONOLITH வகைக் கோவில்கள் மொத்தம் ஒன்பது உள்ளன.

பஞ்சபாண்டவ ரதங்கள்?

இவற்றை உருவாக்கியவன் ராஜசிம்ம பல்லவன் ஆவான். அவனைக் குறித்த பல தகவல்களை இங்குள்ள பல்லவ கல்வெட்டுக்கள் கூறுவன.

”ப்ருதாஸ்”எனப்படும் புகழ் மாலைச் செய்யுள்கள் ரதங்களில் உள்ளன. ராஜசிம்மனை ”ஆத்யந்த காமன்”என்று புகழ்கின்றன். [எல்லையில்லாத புகழ் ஈட்டுவதில் முடிவில்லாத ஆசை கொண்டவன் என்று பொருள்]

பராபரா, பரா, நாராயண மனோஹரன், புவபாஜனன், நரசிம்மன், மஹாமல்லன், சர்வதோபத்ரன், ரண ஜெயன் போன்ற பல பட்டப்பெயர்களைக் கல்வெட்டுகள் தருகின்றன.

பஞ்ச ரதங்களில் - சனாதன தர்மத்தின் அறுவகைக் கடவுள்களுக்கு உரிய ரதக்கோவில்கள்...

அவற்றுள் ”பஞ்ச பாண்டவர் ரதங்கள்”எனப்படுபவை மிகவும் ப்ரஸித்தி பெற்றவை.ஆனால் அவை பஞ்ச பாண்டவர்களுக்கே உரியதா என்ற ஆய்வுக் கேள்வி உண்டு. காரணம் அவற்றுள் உள்ள துர்கைக் கோவில், முருகனுக்கு உரிய மாபெரும் யானை, துர்கையின் சிம்ம வாஹனம் ஆகியன சில கேள்விகளை முன் வைக்கின்றன.ஆதி சங்கரரின் அத்வைத்த தத்துவத்தை ஏற்றுக் கொண்ட பல்லவன் நரசிம்ம வர்மன் 1 ஏன் வேத மார்கத்தின் அறுசமய தெய்வங்களுக்கு இவற்றை ஏற்படுத்தும் எண்ணத்தை விதைத்து இருக்கக் கூடாது?

கொற்றவைக் கோவில்...

துர்கையின் அழகிய சதுர வடிவான கோயில் மிகவும் கண்ணைக் கவர்கின்றது.அது அழகிய மிக நுட்பமான வழுவழுப்பாக இருக்கிறது. சுவற்றுடன் புடைப்புச் சிற்பமாக துர்கை மிகப் பழமையான தோற்றத்தில் நின்ற கோலத்தில் இருக்கிறாள். ”குட்டை க்ரஹம்”என்றே இது அழைக்கப் படுகின்றது. கோவிலை ”க்ரஹம்”- வீடு என்றே பல்லவர்கள் அழைத்தனர்.

சங்கும் [தற்போது இல்லை] ப்ரயோக சக்ரமும் தாங்கிய விஷ்ணு துர்கை வடிவில் தேவியை வடித்துள்ளனர்.வலது கை சற்று சாய்ந்து அபயக்கரம் காட்டுவதாகவும், இடது கை கம்பீரமாகத் தொடை மீது ஊன்றப்பட்டும் உள்ளன.இக்கால விஷ்ணு துர்கை சற்று இடையை வளைத்து இருப்பது போல் காணப் படும்.ஆனால் இவள் நேராக நிற்கிறாள்.அன்னையில் தலைக்கு மேல் இருபக்கமும் அவளது பணியாளர்களாக மொத்தம் நான்கு பூதகணங்கள் உள்ளன.

அன்னை பருத்த ஸ்தனங்களில் துணியால் கச்சு அணிந்துள்ளாள்.இது அக்காலப் பெண்களின் மேலாடை வகையைக் காட்டும்.இடையின் இரு புறமும் அழகிய தொங்கல் பட்டுகள் வழிந்துள்ளன.

பாதங்களில் சிலம்பும், கரங்களில் பருத்த வளைகளும், கழுத்தில் மணிமாலைகளும் உள்ளன.காதுகளில் பெருத்த குழைகளும், தூக்கி அலங்கரித்து முடியப்பட்ட முடிமகுடமும் தலையில் உள்ளது.எளிய தோற்றமே பல்லவ சிற்பங்களின் தன்மை.அன்னை அழகிய தாமரை இதழ் பீடத்தின் மீது நிற்கிறாள்.

மிக உயர்ந்த த்யாகம்..

மிகத் தொன்மையான கொற்றவை - காளி வழிபாட்டின் சின்னமாக இக்கோவில் உள்ளது.உள்ளே அன்னையின் கீழ் இரு வீரர்கள் தங்கள் தலையையும், உடல் பாகங்களையும் வெட்டி பலி இடுவதாகச் சிற்பங்கள் உள்ளன.தன் கற்றை முடியைக் கொத்தாகப் பிடித்துத் தூக்கித் தன் தலையை அரியும் கோலத்தில் அவ்வீரன் அமர்ந்திருக்கிறான்.தன் தேசத்தின் நலனுக்காக உடல் பற்றை, உயிர்ப் பற்றை, வாழ்க்கைப் பற்றை விடுத்துத் தன் ஆணவம் அகன்று தன்னையே பலியிடும் உயர்நிலை பலி சாக்தத்தில் [சக்தி வழிபாட்டில்] இருந்துள்ளது.அவ்வாறு உயிர் த்யாகம் செய்த வீரர்களுக்கு உரிய வீர நடுகற்கள் தமிழகத்தில் பல உள்ளன.

மிகப் பழங்காலத்தில் கொற்றவை வழிபாட்டில் ரண பலிகளும் உண்டு.சிலப்பதிகாரம், மணிமேகலை இவற்றைக் கூறும்.பல்லவ தேசத்தின் நலனுக்காகத் தங்கள் இன்னுயிரை பலி இட்ட இரு வீரர்களாகவும் இருக்கக் கூடும்.

கோவிலின் வெளிவாசலில் இருபுறத்தேயும் இரண்டு த்வார பாலகிகள் உள்ளனர்.இக்கோவிலில் பூஜைகள் நிகழ்ந்து இருக்கலாம்.

சுற்றுப் ப்ரகாரத்தில் மகிஷனின் தலை மீது நிற்கும் விஷ்ணு துர்கை [கோஷ்ட மூர்த்தி] இருக்கிறாள்.இந்த pattern எல்லாம் ஆதியில் கோவில் வாஸ்த்துவில் அருவுருவமாக இருந்ததை, பல்லவர்கள் உருவமாகக் கொண்டு வந்தனர். கோஷ்டம் [மாடம்] மிக அழகிய வேலைப்பாட்டுடன் உள்ளது.

Sakthi oundation

மாமல்லபுரமும் மேலை நாட்டினரும்...

1582 A.D - கோச்ரோ பல்ஃபி

”St.தமாஸ் மலையில் இருந்து 8லீ தூரம் பயணம் செய்து அதிகால மூன்று மணிக்கு இவ்வூரைப் படகு மூலம் அடைந்தோம். ”7 பகோடாஸ்” என்று இதை அழைக்கிறோம்.7 மிக அற்புதமான கற்கோயில்கள் உள்ளன.இவை அதிகம் உயரம் இல்லாத பாறைக்குன்றுகளைக் கொண்டே உருவானவைவற்றை மதிக்கம் வண்ணம் மூன்று முறை சல்யூட் செய்தோம்”

1700 A.D - நிகோலோ மனூசி

”சோழ மண்டலக் கடற்கரையில் சத்ரஸ்படோ என்ற சதுரங்கப்பட்டிணத்திற்கு வடக்கில் 4லீ தொலைவில் மாவேலிவரோ உள்ளது.சைனா தேசத்து சிற்பம் போல் இங்கு பல அழகிய சிற்பங்கள் உள்ளன.”

1727 A.D - ஹெமில்டன்

”கொன்னிமரே என்ற இடத்தில் அழகிய ஏழு பகோடாக்களைப் பார்த்து ரஸித்தேன்.பல விஷயங்கள் மறந்து விட்டன.தேசம் முழுவதும் இருந்து மக்கள் இவ்வூரைக்கு ஆண்டு முழுவதும் வந்து பார்க்கிறார்கள்.”

பொட்டாம்,

”நான் 1721ல் இக்கடற்பகுதியில் பயணம் செய்யும் போது என் கப்பல் உடைந்து மூழ்கியது, நான் தப்பித்தேன்.1727ல் சார்ல்டன் என்ற மீட்புக் கப்பலில் மீட்கும் எந்திரத்துடன் வந்தேன், என் கப்பலைக் கண்டேன், ஆனால் அலைகள் மிகவும் கடுமையானவை, விட்டு விட்டேன்”

1788 A.D - சேம்பர்ஸ், [முதன்முதலில் மாமல்லபுரத்தைப் பற்றி விரிவான நூல் எழுதியவர்]

”பல மீனவர்களும் வயோதிகரும் கடலுள் இன்னும் சில பகோடாக்கள் இருப்பதைக் கண்டுள்ளதாக என்னிடம் கூறினர்.”

1794 A.D - அரிவிட்னி,

”கிழக்கு இந்திய கம்பெனி வெளியிட்ட மதராஸ் வரைபடத்தில் மாமல்லபுரத்தை ஏழு பகோடாக்கள் என்று கூறுக”

1798 A.D - கோல்டிங்ஹாம்,

”கணேச ரதத்தில் சிவலிங்கம் இருக்கிறது”

1800 A.D - ப்ரா போலினாடா,

” பாரத தேசத்தின் மிகவும் ஒப்பற்ற கலை மாமல்லபுரமே! இதை எப்படிப் புகழ்வேன்? என் வாழ்க்கையில் இதைப் போன்ற அழகிய படைப்பைக் கண்டதே இல்லை! எனக்கு ஐந்து விஷயம் அறிந்த அந்தணர்கள் அனைத்தையும் விளக்கிக் கூறினர்.அவர்கள் போர்த்துகீஸ் பேசினர்.அவர்களுக்கு ரூ.5 கொடுத்தேன்.”

1810 A.D - செளதே என்ற ஆங்கிலேயர் மாமல்லபுரத்தைப் புகழ்ந்து அழகிய கவிதையே படைத்து லண்டலின் வெளியிட்டார்.

அதே வேளையில் மாமல்லபுரம் சிற்பங்கள் தங்களுக்குப் பிடிக்கவில்லை என்று பதிவு செய்துள்ள பயணிகளும் உண்டு.

1844 A.D - வால்டர் எலியட்ஸ் பல கல்வெட்டுகளை ப்ரதி எடுத்து ஆராய்ந்தவர்.ஆதிவராஹ பெருமாள் குகையில் இருக்கும் கல்வெட்டை அறிய ரூ.30 தந்துள்ளனர்.மேல் தேசத்தினர் உலகில் உயர்ந்த பல விஷயங்களை மதிப்பதையே நம் தேசத்தார் பின்பற்ற்றுதல் உண்மையான western culture ஆகும்.

வெறுமனே cell phoneகளில் தங்களைச் சிலைகளுடன் புகைப்படம் எடுத்துக் கொள்வதுடன் மட்டுமின்றி இவற்றைப் பற்றிச் சிந்திக்கவும் வேண்டும்.